سبحانك يا ربّ، يا إله السما والأرض، كل الكون بينحني لإلك إجلال وخشوع وتسبيح وشكر على حضورك الدايم مع خليقتك.
يا إلهنا الحبيب، سؤال أساسي بحياتنا لازم نضلّ كل لحظة وكل يوم نسألو: مين الأوّل بحياتنا؟
مين عم نخدم؟
الله وخيّنا الانسان، أم ذواتنا وأنانياتنا ورغباتنا؟
وشو هوي هدفنا بالحياة؟
يا ربّ، منعرف إنّو رغبة قلبك هيي إننا نكون ساهرين على خلاص أنفسنا وخلاص الآخرين، بس المشكلة هيّي عم بتكون فينا لأننا عم نعيش الإزدواجيّة بين بدنا ياك بس ما عم نبرهن هالشي، وبين ما بدنا العالم المادي، وقرفانين منّو بس عم ننغمس فيه.
يا إلهنا الغالي، روحك القدّوس وحدو اللي قادر إنّو يقودنا للدرب الصحيح وللأعمال المنيحة، ونحنا ما عم نعرف نطلبو بحياتنا.
تعا يا روح الله وأسكن بقلوبنا وأفكارنا وعقولنا تا نعرف نحب ونخدم الربّ بصدق.
/الخوري يوسف بركات/
