مع نهاية هالأسبوع المبارك، وبصباح هالنهار الحلو اللي عم تشرق فيه نورك علينا يا ربّ، منرفعلك كل التسبيح والمجد والإكرام.
إذا بدنا نكون متل توما، رح نسألك مين نحنا يا ربّ تا حتى نكون شغلك الشاغل؟
بس أكيد جوابك رح بيكون إننا أبناءك وأحبابك اللي كرمالنا صرت إنسان وعشت بيناتنا ومتت وقمت ورجعت طلعت عالسما بصعود إلهي تا تحضّرلنا مكان ببيت بيّك السماوي.
مين نحنا بنظرك يا ربّ تا تعطينا كل هالأهمّيّة؟ نحنا ولادك وصورتك بين العالم، إنت إلهنا اللي من بعد قيامتك وعدتنا بحياة معك مليانة فرح وسلام وتسبيح أبديّ، شرط إننا نكون مثالك بين البشر.
كيف بدنا نحصل عا هالحياة اللي وعدتنا فيها يا ربّ ونحنا كلنا حقد وحسد وبغض ونميمة، نحنا اللي بإرادتنا ضيّعنا طريق الملكوت؟ صوتك بيضل يحكي قلوبنا تا نمشي معك ومنوصل لأنّك إنت الطريق والحق والحياة.
/الخوري يوسف بركات/
