صباحك يا ربّي يسوع، أجمل صباح بالحياة، وكل ما بتشرق شمس النهار، منحسّ بدفء نورك علينا يا إله السما والأرض، منسبّحك ومنشكرك على حبّك الكبير.
سبحانك يا ربّ كيف كوّنت هالحياة وكل المخلوقات، من أكبرا لأصغرا، يا ربّ، كل الأكل بحاجة لمقبّلات، ومن دونن ما في الو طعمه، هيي اللي بتعطيه النكهة، وهيك ملكوتك بالعالم يا إله المحبّة.
واللي بيعطي ملكوتك النكهة بعالمنا هوي حضورنا، حضور الكنيسة، جسدك السرّي، وهيدا اللي بيخلّي مسؤوليّتنا كبيرة، متل الملح بالأكل والنور بالعالم، ومن دون كنيستك ما في للحياة طعم ولون.
لمّن أرسلتنا يا ربّ، متل ما أرسلت تلاميذك، دعيتنا تا نعلن حضورك بالعالم، وننشر رسالتك وتعاليمك وحبّك بقلوب الكلّ، ونحنا رح نلبّي هالدعوة ونحبّك بكل إنسان.
/الخوري يوسف بركات/
